Қамзин Кәкен 1949 жылы 13 маусымда Жетісу облысы, Алакөл ауданы, Қарлығаш ауылында дүниеге келді. Алматыдағы №9 қазақ орта мектеп-интернатын бітіргеннен кейін екі жыл ұжымшар өндірісінде жұмыс істеді. 1968–1973 жж. аралығында С.М. Киров атындағы Қазақ мемлекеттік университетінің журналистика факультетінде оқыды. Одан соң Қазақ КСР Телевизия және радиохабары жөніндегі мемлекеттік комитетінде, «Жазушы» баспасында редактор, «Алматы ақшамы» – «Вечерняя Алма-Ата» газетінде аға тілші, «Парасат» журналының жауапты хатшысы, «Қазақ мемлекеті» газеті бас редакторының бірінші орынбасары қызметтерін атқарды. Ол – Қазақстан Жазушылар Одағының мүшесі, төрт көркем проза кітабының авторы. Оның шығармашылығы туралы кезінде қазақ әдебитетінің классигі Ғ.М. Мүсірепов, ҚР Мемлекеттік сыйлығының лауреаты Р. Тоқтаров, белгілі әдебиет сыншысы С. Әшімбаев жылы лебіз білдірген. Қалмгер 2008 жылы «ZER- SU» корпорациясының халықаралық әдеби Бас жүлдесін жеңіп алды. 1994 жылы К. Қамзин өз ұясына – әл-Фараби атындағы Қазақ ұлттық университетіне оқытушылық жұмысқа ауысты. Ғалым-педагог 1999 жылы «Е.П. Михаэлистің «Семипалатинские областные ведомости» газетіндегі журналистік қызметі» тақырыбында кандидаттық диссертация қорғады. Ғылыми ізденісін әрі қарай жалғастырған ол 2009 жылы «Қазақ публицистикасы жанрларының эволюциясы» тақырыбында докторлық диссертациясын сәтті қорғап шықты. Ол 100-ге жуық ғылыми мақала жариялады. ҚазҰУ қабырғасында еңбек ете жүріп ол үш оқу құралын – «Е.П. Михаэлистің журналистік қызметі», «Журналистика негіздері», «Талдамалы журналистика», «Қазақ публицистика жанрларының эволюциясы». «Көсемсөз панорамасындағы заман палитрасы» (екінші автор – Б. Әліқожа) бір топ ғалымдармен бірлесе «Қазақ журналистикасы» үш томдығын, «Қазақ көсемсөзі жанрларының кемелдену үдерісі», «Е.П. Михаэлистің журналистік және әлеуметтік қызметі» монографияларын жарыққа шығарды. Зерттеушінің бірқатар ғылыми жұмыстары Германияда, Польшада, Канадада, Қытайда, Монғолияда, Англияда, Италияда, Ресей мен Өзбекстанда жарық көрді. Филология ғылымдарының докторы, профессор К. Қамзиннің ғылыми өрісіне заманалы журналистиканың ұлттық журналистика жанрларының өркендеуі, журналистика мәтіндерінің сындарлы потенциалы, контент энергетикасы, гуманитарлық және техникалық ғылымның өзара ықпалдастығы сияқты зәру мәселелер кіреді.